2021年4月14日星期三


朱sir薑汁蛋撻

亞仔話咗想食蛋撻好耐,我都拖咗佢好耐😉之前想整嘅時候但係因為天陰(乜嘢藉口😂😜),我話整完出嚟影相唔靚。尋日都係諗住整蛋撻,但係最後就整咗麵包,整完麵包之後其實我已經攰,加上而家冬令時間好早天黑,所以又繼續拖。尋晚未夠十二點我瞓咗覺,今朝起身我就的起心肝還債。


其實我對整蛋撻冇乜信心,印象中之前整嘅都唔係咁滿意,不過我對朱sir嘅食譜有信心,所以又去馬。


由於係第一次用呢個食譜,所以我係跟足晒所有嘅材料。55g 薑汁我用slow juicer磨, 之後順便整埋蔬菜汁。由於係薑汁蛋撻,亞仔話似燉蛋多過似食蛋撻😑我下次會將薑汁部份改用水。


呢個蛋撻皮我都好滿意,以前整完啲皮又驚佢軟得滯,我又會放返入雪櫃,今次跟足食譜,搓完就直接放啲蛋漿落去焗,連拮窿都冇,反而係咁多次最滿意嘅一次,簡單直接👍🏻。


出爐早餐食咗兩個,下午茶加杯黑糖薑母珍珠奶茶又食多一個,本來已經放咗入雪櫃,隔左幾個鐘頭之後氣炸鍋150度3分鐘同新鮮嘅一樣,大滿足。下個星期要落力啲workout 💪🏻, 希望減返兩kg先到聖誕節。


食譜大家可以去YouTube chef chu kitchen 睇:


https://youtu.be/3qjXLuX31k0


上面係我copy自己個fb page某一日嘅post, 之後我仲整過幾次原味蛋撻以下係我嘅份量:


撻皮係100%朱sir八個份量:78g牛油 18g糖 8g奶 115g麵粉 10g奶粉

Filling我就計返兩隻蛋(減8g用咗去整皮嘅份量):45g水煮溶33g糖,94g蛋,123g奶

180c 17-20分鐘




2021年4月13日星期二

 四年後再update呢個blog!!!

講真,唔係好記得點用,4年前可能我仲係用緊電腦,之後多咗fb page就冇再update呢度。

不過其實喺fb page好難搵返D舊post加食譜,所以我決定遇到好食譜會再次喺呢度記低!

呢個tart用咗朱sir蛋撻皮去做,過兩日再整先記低做法。總之喺度出現得嘅,必屬可以一整再整之作。





2017年5月5日星期五

低卡香蔥芝麻餅




好多時候我臨瞓之前都會(好勤力)睇吓人哋啲blog 有乜好嘢食, 第二朝瞓醒就可以去整。其實真係幾自虐,尤其係依幾晚我八點之後唔俾自己食嘢,真係越睇越肚餓。

2017年5月3日星期三

升級版蘋果蛋糕




五月一號嗰日,我話慶祝我哋搬咗入嚟五年(正確應該係4月30號),加上落雨要揾D嘢整,我話要整個蛋糕。
屋企嗰兩個對蘋果蛋糕情有獨鍾,不過我對於呢D意大利甜品店經常出現嘅"黃色蛋糕"一D興趣都冇,所以我話要整個升級版😈
我喺蛋糕面加咗crumble 脆脆,我絕對相信越邪惡越美味!

2017年4月9日星期日

Tiramisù 四重奏


個名係咪改得好勁😜通常嗰D咩朱古力三重奏蛋糕即係有三種唔同嘅朱古力,咁我呢個tiramisù 四重奏就係一個tiramisù 有四種味。

2017年4月5日星期三

滷味sss


早幾日買咗D農場自家出品嘅雞蛋,我特別要咗D蛋黃比較橙色的。用嚟整蛋糕有D嘥,所以我決定整半熟糖心味蛋。

2017年3月31日星期五

班蘭蛋糕2.0版


早排整咗一次班蘭蛋糕(....係呀栗子蛋糕仲未還嘅時候又整第二次班蘭蛋糕),上次膽粗粗俾咗新加坡朋友試食,得到好多寶貴嘅意見,仲有一個新加坡blogger(http://kitchentigress.blogspot.it/?m=1)嘅食譜,真係大收穫!